Back
Next
Kuxëna Kishelëmienk, kehëla wanìshi tìli nkàski kwiakwi yushè nipain, òk tìli nkàski kwiakwi nakatàmën nihëlàchi èlixsia, èli nuli watun weltëk wèmi kèku Ki wënchixën. Nal në shùk nkàski lìsin, pèchi may shùk winëwe tìlìch tëmakelëminèn, wèmi èntxienkw, yuki kitisënanàk yushè. Milinèn wëlamàlsëwakàn, wëlatenamëwakàn, wënchìch kàski ahpamskaneyo yushè ènta xkwithakamika. Nuxa Kishelëmienkw, tëmakelëminèn wèmi èntxienkw, kenahkihinèn kwëni kishukw tìlìch kàski ahpamskanèn yushè ènta xkwithakamika. Tëmakelëmi nuxati Kishelëmienkw, wètënëmai winëweokàn, ènta yushè nkëktëmaki nipain, Nuxa. Wètënëmai ènta këktëmaktunhea, Nuxati. Nal në shùk nkàski lìsin, pèchi may shùk nkëktëmaktunhè. Wanìshi nuxa Kishelëmienkw. Na në lekèch.